18
Apr
2017

Galv da vanifestiñ : ur stourmer Ai’ta! galvet gant an archerien evit bezañ distaliet panelloù war an hentoù-tizh

Daoust d’ar c’houlzad kabaliñ e kendalc’h ar Stad e labour evit distruj hor yezh ! 

Da heul an emglev evit dazont Breizh e oa bet sinet ur c’henemglev a-ziforc’h evit treuzkas yezhoù Breizh ha diorren an implij anezho er vuhez pemdez etre ar Stad hag ar rannvro e miz Here 2015. 

Dre ar c’henemglev-se e oa tu da lakaat e pleustr ur banellerezh divyezhek war hentoù-tizh Breizh en un doare heñvel ouzh ar pezh a vez graet gant ar strollegezhioù lec’hel abaoe bloavezhioù.

Koulskoude n’eus bet divizet tra gant ar Stad daoust d’ar c’henemglev-se bezañ sinet abaoe ouzhpenn bloaz. N’o deus kroget servijoù ar Stad da vont e darempred gant servijoù ar rannvro zoken, evit diviz asambles an doareoù lakaat e pleustr seurt ur panellerezh nag an deiziadur evit al labourioù.

Aozet e oa bet gant ar strollad Ai’ta! e miz Genver un oberenn arouezel distaliañ panelloù evit sevel a-enep an diouer a youl diskouezet gant ar Stad.

Respontet en doa prefed Breizh en ul lizher kaset deomp (gwelet lizher prefed Breizh caser d’an 25 a viz Genver 2017) e vije bet kroget an divizoù gant ar rannvro. Gortoz pell gortoz pell ? 4 miz goude eo dav anzav sklaer ne oa nemet komzoù toull rak n’eus bet kroget tra da vat ! 

Gwashoc’h c’hoazh just araok an dilennadeg ar Prezidant ha dilennadegoù kannaded da heul, ha daoust d’ar c’homzoù flour dalc’het gant lod, eo bet savet klemm gant servijoù ar Stad a-enep strollad Ai’ta ! (daoust pezh oa bet skrivet gant ar prefed!). Galvet e vo ur stourmer eus strollad Ai’ta! gant archerien Gwitalmeze d’an 22 a viz Ebrel da 10 e 30 mintin.

Evit souten ar stourmer ha sevel a-enep youl distruj hor yezh a-berzh ar Stad e c’halv strollad Ai’ta! da vanifestiñ dirak archerdi Gwitalmeze (5 straed Hanter Hent) d’ar sadorn 22 a viz Ebrel adalek 10 e 15 beure. 

«
»

Comments are closed.

Rannañ