Gant strollad Ai’ta !, hag a zifenn implij ar brezhoneg er vuhez foran, e vo aozet ur votadeg foran d’ar sadorn 27 a viz Even, eus 10e da greisteiz, e ti-gar Kemperle. Pal ar votadeg-mañ a vo goulennata ar veajourien, an implijidi, kement ha tud ar vro war plas ar brezhoneg en ti-gar nevez da-heul al labourioù. Ur goulenn eeun a vo savet outo : « Ha mat eo deoc’h e vefe divyezhek, brezhoneg ha galleg par-ouzh-par, ti-gar Kemperle ? »
Ur strollad hag a stourm evit diorren ar brezhoneg er vuhez foran eo Ai’ta !. Abaoe m’eo bet krouet e 2005 en deus goulennet hor strollad emgavioù ha skrivet un toullad lizhiri da renerien an SNCF ha da Guzul rannvro Breizh evit goulenn ma vo brezhoneg en trenioù hag en tiez-gar (panellioù, mekanikoù, kemennadennoù dre gomz, lakaat war-raok an implijidi a oar brezhoneg…). Ne c’hell chom bev ur yezh nemet ma c’heller ober ganti bemdez, da lavaret eo gwelet, klevet ha komz brezhoneg e kement degouezh posubl. Kement-mañ a rank bezañ gwir ivez er rouedad tiez-gar ha trenioù a gaver e Breizh, rak kalzig a dud a vez o vont hag o tont drezañ. Perak ‘ta e vefe dibosubl ober e Breizh ar pezh a vez graet abaoe pell evit yezhoù minorel all en Europa ?
Abaoe meur a vloavezh e vez graet gant ar brezhoneg e tiez-gar TER/THR zo. Labourioù a vez en holl diez-gar TGV/TTB (evel amañ e Kemperle), pe a vo a-raok pell. Un degouezh a zoare eo eta evit degas ar brezhoneg el lec’hioù-se, ha war ar panelloù da gentañ penn, par ouzh ar galleg (memes titouroù en div yezh, memes ment, memes stumm d’al lizherennoù), evit ma c’hello ar vrezhonegerien ober aes gant o yezh. Gant an oberoù-mañ ez afe an SNCF war ar memes hent hag ar politikerezhioù yezh bet votet gant ar strollegezhioù lec’hel (kumun ha Kumuniezh kumunioù Kemperle, departamant Penn-ar-Bed, rannvro Breizh). Harpet eo ivez ar goulenn-mañ gant un toullad dilennidi eus ar vro, en o zouez maer Kemperle ha prezidant ar gumuniezh kumunioù, kannaded ha senedourien.
Deuit niverus da embann ho soñj ha/pe da sikour evit kas ar votadeg da benn !